Dec 27, 2011

විභාග ප්‍රතිඵල අතීතය පුරාම වැරැදිය. ඊට සැබෑ හේතුව මෙයයි.




මෙවර උසස් පෙළ ප්‍රතිඵල අවුල සම්බන්ධයෙන් රටම කැළඹී ඇත. ඒත් විභාග කොමසාරිස් ජනරාල් පවතින්නෙ වැරැද්ද නිවැරැදි කල බවත් වළං කඩේට පැන්න ගොන්නු වගේ හැසිරීමෙන් වලකින ලෙසත්ය.

ඒත් මේ විභාග දෙපාර්තමේන්තුවේ ප්‍රතිඵල වැරැදුණු පළමු අවස්ථාවද? මීට පෙර එක වතාවක්ද මේ කොමසාරිස් ජනරාල් වරයා යටතේම ඕඑම්ආර් අවුලක් ඇතිවිණ. ඒ අවස්ථාවේද කොම්පියුටර් මත වරද පටවා විභාග දෙපාර්තමේන්තුවත්, තමාත්, වැරැදි කල නිලධාරිනුත් ආරක්ෂා කිරීමට මොහු කටයුතු කළේය.

එහෙත් එම අවස්ථාවේද පරිගණක වල කිසිදු අවුලක් නොතිබුණු අතර අපරිනත නිලධාරීන්ගේ වරදින් එය සිදුවී තිබිණ. දේශපාලන හයිය මත විභාග කොමසාරිස් ජනරාල්වරයා තමන්ගේ තනතුර රැක ගත්තේය.

එම වරද සිදුවූයේ මෙම අවස්ථා දෙකේ පමණක්ද?
නැත. එය දිගින් දිගටම සිදුවී ඇත. එහෙත් වැඩේ චොර වෙන්නම ලීක් වූයේ මේ අවස්ථාවන් දෙකේදී පමණි. ඊට හේතුව වී ඇත්තේ එදා සිටම විභාග දෙපාර්තමේන්තුවේ පරිගණක ආශ්‍රිත ප්‍රතිඵල සැකසීම් සම්බන්ධයෙන් කටයුතු කරන ලද්දේ තොරතුරු තාක්ෂණය පිළිබඳ සුදුසුකම් ලත් නිලධාරීන් නොවේ. පරිගණක භාවිතය පටන් ගත් අවදියේදී දේශපාලන හයිය මත පත්වීම් ලබා ගත් නිලධාරීන් පිරිසක් විසින් පරිගණක ආශ්‍රිත රාජකාරී වල යොදවන ලදි. ඒත් මෙම නිලධාරීන්ගෙන් බහුතරයක් විභාග දෙපාර්තමේන්තුවේ එවැනි පත්වීමක් ලබන විට අවම වශයෙන් පරිගණක වැඩසටහන් වල වැඩ කිරීම කෙසේ වෙතත් රේඩියෝ එකක්වත් දාන්න නොදැන සිටි අයයි. ඉන් පසු මේ නඩයෙන් කිහිප දෙනෙකුම දෙපාර්තමේන්තු මුදල් වලින් විදේශ රටවල් වල පුහුණුවීම් වලට පවා සහභාගි කරවා ඇත. ඒත් උපන්ගෙයි මෝඩයන් වූ මෙම නිලධාරීන්ට ඒ පුහුණුවීම් වලින්වත් නිවැරැදිව පරිගණක වැඩසටහන් මෙහෙයවීමට හැකියාව ලැබුණේ නැත.  

මෙවැනි භාරදූර්ය කාර්යභාරයක් පැවැරිය යුත්තේ වගකිව යුතු ආයතනයක් විදියට තොරතුරු තාක්ෂණය පිළිබඳ ඉහළ සුදුසුකම් ලත් අයවලුන්ටය. ඒත් දැනටත් විභාග දෙපාර්තමේන්තුවේ පද්ධති විශ්ලේෂක හෝ වෙනත් තොරතුරු තාක්ෂණයට අදාල තනතුරු දරන්නන් ලංකාවේ විශ්ව විද්‍යාලයක තොරතුරු තාක්ෂණය පිළිබඳ උපාධියක් ලැබූ අය නොවේ. ඔවුන්ගෙන් වැඩිදෙනෙක් දත්ත සටහන් ක්‍රියාකරු ලෙස දේශපාලන පත්වීම් ලැබ පසුව හිටපු විභාග කොමසාරිස්වරුන්ගේ ගොම්පස් අල්ලා උසස්වීම් මත පරිගණක වැඩසටහන් ක්‍රියාකරුවන් බවට පත්වූවන්ය.

තොරතුරු තාක්ෂණය මෙතරම් දියුණු සමයක මේ පප්පලා පැත්තකට කර අලුත් පරපුරේ පරිගණක වැඩසටහන්කරුවන් පත් කිරීමට මෙතෙක් දෙපාර්තමේන්තුව උත්සාහ කර නොමැත්තේ විභාග ප්‍රතිඵල නිකුත් කිරීම සම්බන්ධව කිසිම වගකීමක් නැති ආකාරයටය.

එසේම මීට අමතර වශයෙන් නැවත සමීක්ෂණ වලදී ප්‍රතිඵල වෙනස් වන ප්‍රතිශතය පසුගිය වසර වල ඉහළ ප්‍රතිශතයක් ගත්තේය. එසේ වන්නේ කොහොමද? නැවත සමීක්ෂණ සඳහා අයදුම් කරන්නේ ඉතාම සීමිත පිරිසකි. ඒ සීමිත පිරිස තුළත් සැලකිය යුතු ප්‍රතිශතයක ප්‍රතිඵල වෙනස් වන්නේනම් විභාග උත්තර පත්‍ර ඇගැයීම් කාර්යයේදී පවා  අසීමති වගකීමක් රහිතව කටයුතු කර ඇත. එසේම බොහෝ විට නැවත සමීක්ෂණ වලදී විභාග උත්තර පත්‍ර යළි සම්පූර්ණයෙන් ඇගයීමකට ලක්කරන්නේ නැත. එසේ කරන්නේ අහඹු ලෙස ගත් ඒවා පමණි. බොහෝ විට නැවත සමීක්ෂණ වලදී ලකුණු එකතු කිරීම් නැවැරැදිද යන්න පමණක් පරීක්ෂා කිරීම සිදු කරයි.

මේ කරුණු අනුව විභාග දෙපාර්තමේන්තුවේ සැලකිය යුතු ඉතිහාසයක සිට නිකුත් වූ විභාග ප්‍රතිඵලයක් සම්පූර්ණ ශුද්ධ ප්‍රතිඵලයක් ලෙස සැලකිය නොහැක.

දැනට වුවද සිදුවන වැරැදි නිවැරැදි කිරීම වෙනුවට නිලධාරීන් ආරක්ෂා කිරීමත් බොරු කීමත්, වගකීමෙන් නිදහස් වීමත් විභාග දෙපාර්තමේන්තුව සිදු කරන එකම කාර්යයයි.

කොහෙදෝ තැනක කවුරු හරි ලියා තිබී කියවන්නට ලැබුණා මෙහෙම දෙයක්,
විභාග දෙපාර්තමේන්තුවේ විභාග ප්‍රතිඵල වැරැදි සහගතව නිකුත් කරන්නේ රජයේ වරදකින් නොවේ. එය 70, 80 දශකයේ පවා සිදුවී ඇත. නැත්නම් එස්.බී. වැනි ගොන් තඩියෙකු විශ්ව විද්‍යාලයකට තේරීමට ඉඩක් නැත කියල.

ඇත්තෙන්ම ඒ උපහාසය තුළ විශාල සත්‍යයක් ගැබ්වී ඇත. එස්බී මෙන්ම උගතුන් ලෙස පෙනී සිටින ආණ්ඩුවේ බහුතරයක් හැසිරෙන විදියට ඔවුන්ගේ උගත්කම විභාග දෙපාර්තමේන්තුවේ වරදකින් සිදුවූවක් කියා නොසිතා බැරිය.

සමහර විට සමහරුන් චෝදනා කල ලෙසම මැතිවරණ දෙපාර්තමේන්තුවේ පරිගණක වැඩසටහන් සම්පාදනය කරන්නේද මෙවැනි අම්බරු පරිඝණක නිලධාරීන් කොටසක්ද යන්න සැක සහිතය.

සුබ අනාතගතයක්

Dec 15, 2011

හිස් කළගෙඩි හිසින් රැගෙන එළිය දකින්නයි අපි යන්නේ..




ඇය මා සේවය කරන ‍ස්ථානයේම සේවය කරන නිලධාරිනියකි. මේ දවස් වල හිටු කියල ඇය ඇගේ පශ්චාත් උපාධිය සඳහා වෙහෙසේ.
පුරාණ චිත්‍ර සහ මූර්ති පිළිබඳ පර්යේෂණාත්මක නිබන්ධනයක් සැකසීම ඒ සඳහා ඇයට ලැබී ඇති පැවරුමකි.
ඇයට පළමුව විශ්ව විද්‍යාලයෙන් ලබා දී තිබුණේ මා කිසිදා නම අසා නැති මට මතකත් නැති ඌව පළාතට අයත් වන යාල ප්‍රදේශයට ආසන්න පුරාණ ගල්‍ ලෙනක් පිළිබඳවයි. ඇය ඒ පිළිබඳව මගෙන්ද කරුණු විමසන ලද අතර එය පවතින තැන පිළිබඳ පමණක් අන්තර්ජාල පරීක්ෂාවකදී මට සොයා ගත හැකිවිය. එහෙත් එහි ගල්ලෙන් වල පවතින චිත්‍ර හෝ මූර්ති පිළිබඳ කිසිදු ලියවිල්ලක් අන්තර්ජාලයේ නොතිබිණ. ඒ පිළිබඳ ඇය පුරා විද්‍යා දෙපාර්තමේන්තුවෙන්ද කරුණු සොයා බලන ලද නමුත් එහිද එම ස්ථානයේ ඇති චිත්‍ර හෝ මූර්ති ගැන කරුණු කිසිවක් නොමැති බව අනාවරණය විය.
ඉතින් මම ඇයට යෝජනා කළේ
ඔයාගෙ වැඩේට අපි කිහිප දෙනෙක් සෙට් වෙලා ගිහින් කරුණු හොයමු කියාය.
ඒත් ඇය කීවේ ගෙදරින් එච්චර දුර යන්න දෙන්නෙ නෑ කියාය.

පසු දිනක ඇය පරිගණක තිරයේ පැරැණි ගල්ලෙන් ආශ්‍රිත චිත්‍ර මූර්ති කිහිපයක් පරීක්ෂා කරනු දුටු මා විමසා සිටියේ,
ඔයාට අර කියපු තැන ඒවද ඔය ලැබුණේ
නෑ මම තැන වෙනස් කරගත්ත කතා කරල
එතකොට ඕක තියෙන්නෙ කොහෙද
මේක තියෙන්නෙ අම්පාර කිට්ටුව සියඹලාන්ඩුව පැත්තෙලු
එතකොට දැන් යන්ද මේක බලල කරුණු හොයන්න
නෑ මම පුරා විද්‍යා දෙපාර්තමේන්තුවෙන් කරුණු හොයාගත්තා
එතකොට ඔයා නිබන්ධනයක් හදන්නෙ අඩුම ගාණෙ මේ ගල් ලෙන දැකලවත් නෙවෙයිද?
නෑ ඕවගෙ යන්න බෑ
එතකොට ඔය පුරා විද්‍ය දෙපාර්තමේන්තුවේ තියෙන ටිකම කොපි කරලද ඔයා උපාධි නිබන්ධනය හදන්නෙ
ඔව් එහෙම තමයි ඔක්කොම අය කරන්නෙ
එතකොට ඒක නියම පර්යේෂණයක් වෙන්නෙ නෑනෙ. අඩුම ගාණෙ තමන් පර්යේෂණය කරන්නෙ මොකක්ද කියලවත් දැනගෙන ඉන්න එපැයි. ඒක තියෙන්නෙ කොහෙද, ඒකට යන්නෙ කොහොමද? පුරාවිද්‍යා දෙපාර්තමේන්තුවේ තියෙන තොරතුරු කොයිකාලෙ ඒවද, ඒ තොරතුරු සහ දැනට සැබවින්ම ඒ ස්ථානයේ පවතින වෙනස්කම් මොනවද?, විශේෂයෙන්ම ඔය කියන ප්‍රදේශය පසුගිය සමයෙ මායිම් ගම්මාන වලට අයිති වුණ තැනක් වගේ පේන නිසා කොටි ත්‍රස්තවාදය නිසා එතැනට යම් හානියක් වෙලාද? එහෙම නැත්නම් එයින් පසු සංවර්ධන ව්‍යාපෘති වලදි එතැනට යම් හානියක් වෙනවද? ඒ ස්ථානය විනාශ වීමට හේතුවන යම් පරිසර හෝ පුදගල සාධක තියෙනවද? ඒ ගැන අවට වෙසෙන මිනිස්සුන්ගෙන් විමසන්නෙ නැද්ද? ඔය ස්ථානය ගැන අතීත ජනප්‍රවාද වගේ දේවල් තියෙනවද කියල ඒ පැත්තෙ ගිහින් හොයල බලන්නෙ නැද්ද?

ඇය නිරුත්තරය.
එහෙම කරන්නෙ නෑ කවුරුවත් ඇගේ පිළිතුරයි.

එතකොට දැනටම ලියවිලා තියෙන තොරතුරු ටිකක් නැවත වෙනස් විදියට සැකසීම වෙනුවෙන්ද විශ්ව විද්‍යාලයේ පශ්චාත් උපාධිය ඇයට හිමි‍වෙන්නෙ. අඩුම වශයෙන් තමන් පර්යේෂණ නිබන්ධනය හදන ස්ථානය ඇහැකින්වත් දැකල නැතුව කරන පර්යේෂණය කොයි වගේ දෙයක්ද? මගේ හිතේ ඒ ප්‍රශ්ණය තවමත් පවතියි.

අධ්‍යාපනය විසින් සැබෑ උගතුන් බිහිකල යුතුයි. ඒත් ඒ වෙනුවට නිකම්ම කොතනක හෝ තිබෙන තොරතුරු ටිකක් පිටපත් කිරීමේ පර්යේෂණ හරහා සැබෑ පර්යේෂකයන් උගතුන් බිහිවෙන්නේද? ඔවුන් නිකම්ම තමන් සත්‍ය වශයෙන්ම දන්නේ නැති කිසිවෙක් විසින් සොයාගත් කරුණු තමන්ගේ කරගෙන එය තමන්ගේම නිබන්ධනයක් ලෙස සකසමින් සතුටු වෙයි. මේ උගත්කමට හෘද සාක්ෂියක් තිබේද?

ලංකාවෙ බොහෝ උගතුන් මේ වගේ කට පාඩම් උගත්තු හෝ පිටපත් කරන උගත්තු බවට පත්වීම පුදුම වෙන්නට කාරණයක් නෙවෙයි. ප්‍රායෝගික සීමාව පවතින්නේ ඔවුන්ගෙන් ගවු ගණනක් දුරිනි.
ඉතින් මෙසේ බිහිවන රෙඩිමේඩ් උගතුන් මුල් තැන් ගත් ලංකාවේ සමාජ ව්‍යුහය මේ තරම්වත් අවුල් ජාලයක් වී නතර වී තිබීමද පුදුමයකි. ඇත්තෙන්ම රාජ්‍ය අංශයේ හැම තැනකම සිදුවන දේවල් කොයි තරම් ළාමකද, අදූරදර්ශීද කියන එකත්, ප්‍රධානීන්ගේ පුද්ගලික ආශාවන් මත එවැනි පරිපාලනමය තීරණ පැමිණෙන බවත් දකින විට මේ අධ්‍යාපන ක්‍රමවේදයේ ඉතාම ගැඹුරු දුර්වලතාවයක් ඇති බව පෙනේ.
මේ අධ්‍යාපනයෙන් කෙනෙක්ගේ හෘද සාක්ෂිය තහවුරු නොවේ. අධ්‍යාපනයක පළමු අර්ථය විය යුත්තේ හෘද සාක්ෂියක් බිහිවීමයි. මොකක් හෝ කරල කඩදාසි සහතිකයකින් සමාජ තත්වයක් ලබා ගැනීමට වඩා ‍ඉගෙන ගන්නා දෙයින් හෝ අභියෝගයට ලක්වන දැනුමෙන් කඩදාසි සහතිකයක් නොලැබුවත් හෘද සාක්ෂියක් ඇති මිනිසෙකු බිහිවේනම් එය සැබෑම අධ්‍යාපනයකි.

Jul 14, 2011

යකෝ අනාගත පරපුර




කුඩු මුදලාලිල ඇමැතිකම් කලොත්?
ඒක අවුලක් නෑ. කුඩ්ඩොනො කුඩු ගහන්නෙ.

හන්දියක් ගාණෙ බාර් අරින එක එතකොට?
ඒක මොකද බං බේබද්දොනෙ අරක්කු බොන්නෙ.

ලෝකෙට ණය වෙන ඒව හොරා කෑම එතකොට?
කවුද බං එහෙම කරන්නෙ?

ගෙවන්න බැරි තරම් ණය අරන් පිස්සු කෙළින කොට?
සංවර්ධනය බං... ඉරිසියා කරන්න එපා

හෙට උපදින එවුන්ටත් මේ ණය ගෙවන්න වෙනවනම්?
අපේ ආර්ථිකය ශක්තිමත් බං

අධ්‍යාපනය පිස්සන් විසින් නැති භංගස්ථාන කරද්දි?
ඕවා දියුණුව බලාගෙන ඉන්න බැරි එවුන් කියන කතා.

උසස් අධ්‍යාපනය එක නරුමයෙක්ගෙ වුවමනාවට විනාශ වෙනවනම්?
පිස්සුද බං ඌ හිත හොඳ එකෙක් බං

එතකොට ගෙදර උන්දැට තමුසෙ කියල කතා කරනවනම්?
ඉවරයි යකෝ අපේ දරු පරපුර... කාළකණ්නි වගේ හැසිරෙන්න එපා...

Jul 5, 2011

ශ්‍රී ලංකේය අභිමානය


18 වැනි ව්‍යවස්ථාව කියවල තියෙනවද?
"නෑ කියවල නෑ"
"එහෙනම් ඒක හොඳයි කියල කිව්වෙ කොහොමද?"
" ඔය කවුරුත් ඒක හොඳයි කිව්වනෙ ඉතින්"


එතකොට දරුස්මාන් වාර්තාව දැකල හරි කියවල තියෙනවද?
"ම්ම්ම්  නෑ"
එහෙනම් ඒකෙ තියෙන්නෙ බොරු කියල කියන්නෙ කොහොමද?
"ඒක කොටින්ගෙ වැඩක්"
කියවන්නෙ නැතිව එහෙම කියන්නෙ කොහොමද?
"කියවපු කට්ටිය කියනවනෙ අපිම කියවන්න ඕනිද"


චැනල් 4 වීඩියෝ එක බලල තියෙනවද?
"බලලනම් නෑ"
එහෙනම් ඒක ව්‍යාජ එකක් කියන්නෙ කොහොමද?
"ඒක කොටින්ට කිරි පොවන එවුන්ගෙ වැඩක්"
බලන්නෙ නැතිව කොහොමද එහෙම කියන්නෙ.
"බලපු අය එහෙම කියන්නෙ ඒ මදැයි"


එතකොට නිකම් ඔයා රූකඩයක් වගේ අනුන්ගෙ කියුම් කෙරුම් වලට යටවෙලානෙ වැඩ කරන්නෙ.


"පල ඩෝ යන්න තෝ කොටින්ට කඩේ යන්නෙ"

May 28, 2011

විකල්ප නායකත්ව පුහුණුවක්..

විශ්ව විද්‍යාල වලට තෝරා ගන්නා සිසු සිසුවියන්ට ලබා දෙන නායකත්ව පුහුණුව සම්බන්ධයෙන් බ්ලොග් අඩවි කිහිපයකම පසුගිය දිනවල ලිපි පල වී තිබුණා. එම ලිපි සහ ඒවාට දක්වා තිබූ පාඨක අදහස් අනුව මේ සම්බන්ධව පහත මතවාද වල සිටින කණ්ඩායම් දැකිය හැකියි.


1. මෙම වැඩසටහන, රජය විසින් දියත් කෙරෙන තවත් යහපත් වැඩපිළිවෙලක් ලෙස සැලකීම (රජය කරන ඕනෑම දෙයක් නිවැරැදි ලෙස අදහන කණ්ඩායම)
2. මෙම වැඩ සටහන සම්පූර්ණයෙන්ම, ගැටඵ විසඳාගැනීමට අපොහොසත් අදාල ඇමැතිවරයා සහ රජය විසින් කරනු ලබන තවත් හත්පොලේ ගා ගැනීමක් බවට පිළිගන්නා කණ්ඩායම
3. සිසු සිසුවියන් විනය ගත කිරීම සඳහා මෙවැනි හමුදාමය වූ විනය වැඩ පිළිවෙලක් වැදගත් බවට පිළිගන්නා කණ්ඩායම


කෙසේ වෙතත් මෙම පිළිගැනීම් සමගම ඉදිරියේදී ඇති කරන ජාතික පාසල් වැඩසටහන ය‍ටතේ විදුහල්පතිවරුන්ටත් හමුදා කඳවුරක පුහුණුවක් ලබා දීමට ‍කටයුතු කරන බව අධ්‍යාපන අමාත්‍යාංශයේ ලේකම්වරයා විසින් පවසා තිබිණි. ඔහු පවසා තිබුණෙ විදුහල්පතිවරුන් තාප්පයක් උඩින් පනින්නවත් හැකියාවක් නැති අය බවයි. සැබැවින්ම දැනට තාප්ප උඩින් නොපැන ගේට්ටුවෙන් පිටවී යනවානම් විදුහල්පතිවරුන් දැනටම සිටිය යුතු තැන සිටින බව පැහැදිලියි. ගේට්ටුවෙන් යන එන  විදුහල්පතිවරුන් තාප්ප උඩින් පනින අශීලාචාර, අක්‍රමවත් මිනිසුන් කොටසක් බවට පත්විය යුතු බව අධ්‍යාපන අමාත්‍යාංශයේ  ලේකම්වරයාට වැටහීම සුබ අනාගතයක් සඳහා යහපත් පෙරනිමිත්තකි. කෙසේ වුවත් තාප්පයකින් පනින්න විදුහල්පතිවරුන්ට පණ නෑ කියන්නේ අඩුම වශයෙන් කෙළින් ඇවිද ගන්නවත් බැරි පුද්ගලයෙක් වීම ගැනනම් සිතා බැලිය යුතුයි.


කොහොම වුණත් මේ වන විට පශ්චාත් යුද මානසිකත්වය විසින් බිලිගෙන ඇති මෙරටෙහි සමාජ මනස සියල්ල මිලිටරිකරණයෙන් ජය ගත හැකි බවට සිතීම අරුමයක් නොවේ. එහෙත් යුද්ධයේදී සිදුවුණේ පරාජය කර යටපත් කිරීමක් බවත් අප යා යුත්තේ සියල්ලන් එක්ව ලෝකය ඉදිරියේ නැගී සිටීමට බව ‍බොහෝ අයට අමතක වී ඇත.
බාහු බලයෙන් විනය ගත කිරීම ප්‍රායෝගිකව කල නොහැක්කක් වන අතර එය මර්ධනය කිරීමක් පමණි. ඒ මර්ධනය කිසිවිට බාහිර විනයක් මිස කිසිවෙක් තුළ අභ්‍යන්තර විනයක් ඇති කරනු නොලබයි. ශරීර ශක්තිය පාලනය කිරීම තුළින් විනය ගත කිරීම හුදෙක්ම බාහිර විනයක් පමණි. යුධ ජයග්‍රහණය නිසා දැනට සන්නද්ධ හමුදා වලට ලැබුණු ප්‍රසාදය නිසා යටපත් වී තිබුණද පසුගිය සමයේ කඳවුරු වලින් පිටතදී හමුදා විනයගත කළවුන්ගෙන් සමාජ දූෂිත දේවල් අපමණව සිදුවුණා. කඳවුරු වලින් පිටත සමාජ ජීවිතයේදී ඔවුන් තමන්ගේ සන්නද්ධ හමුදා බලය පෙන්වා සිවිල් සමාජයේ පුද්ගලික වාසි අත්කර ගැනීමට පෙළඹීම මෙන්ම, බොහෝ අවස්ථාවල රට තුළ සිදුවුණු හොරකම්, මැරකම්, දූෂිත දේවල් වල ප්‍රධාන කොටස් කරුවෝ බවට පත්වීම සුලභ දෙයක් වුණා. ඉතින් මේ හමුදාගත විනය හුදෙක්ම කඳවුරු වලට පමණක් සීමා වූ දෙයක් පමණයි. ඒ වගේම ඒ විනය තුළ පවතින්නෙ සිවිල් පුරවැසියන්ට වඩා බාහු බලයෙන් සහ එඩිතර බවින් සහ බොහෝ දේවලින් තමන් ඉහළයි ලෙස මනසට තෙල බෙදීමක් වෙයි. එය සම්පූර්ණයෙන්ම ආරෝපණයකි. පුහුණුව තුළ බාහු බලය ඉස්මතු කිරීමට හැකිවීම පමණක් සත්‍යයකි. එහෙත් ඒ තුළින් පුද්ගලයා විනයගත වීමක් සිදුවී නැතැයි අද වුණත් රටපුරා සිදුවෙන දේවල් දෙස ඇස් හැර බලන්නේනම් පෙනෙනු ඇත. පසුගිය දින මාතර නඩුකාර උන්නාන්සේට උත්තර නැති වෙන්න බාහු බලයෙන් සලකා තිබුණේ මේ විනයගත වූවායැයි කියන හමුදා නිළධාරීන් පිරිසක් විසිනි. එය තමය මනසට බෙදා ඇති තෙලෙහි ස්වභාවය. උත්තරීතර අධිකරණයේ විනිසුරුවරයා වුවත් ඔවුන්ට ලොකු නැත. රටේ නීතිය හසුරුවන්නන්ට එසේ සලකයිනම් මේ විනයගත වීම සිවිල් සමාජයට අදාල නොවන බව පෙනී යන දෙයකි. මේ ආසන්න එක උදාහරණයක් පමණි.


ඇත්තෙන්ම විනය ගත පුහුණුවක් සියඵම රටේ දරුවන්ට ලබා දිය යුතුය. එහෙත් මෙවැනි පටු දේශපාලනික අරමුණු වෙනුවෙන් නොවේ. එය බාහු බලයත්, කයෙහි කාර්යක්ෂමතාවයත් ඇති කිරීම තුළින් කරන විනය ආරෝපණයක් පමණක් නොවිය යුතුය. එය අහිතකර ප්‍රතිඵල ඇතිකරනු ඇත.
විදුහල්පතිවරුන්ට උස මහත දරුවන්ට බය නොවී පහර දීමට හැකියාව ලබා දීම වැඩක් නැත. බාහු බලය නැති වුවත් පෞරුෂයෙන් යුතු අධ්‍යාත්මයක් ඇති ගුරුවරුන් ළඟ දරුවන් හීලෑ වනු අප දැක ඇත. අපට පහර දෙන සැර පරුෂ ගුරුවරුන්ට වඩා අවංක දයාවෙන්, කරුණාවෙන් පෞරුෂයක් ගොඩනගාගත් ගුරුවරුන් ළඟ වැරැද්දක් කර හසුවුන විට අතිමහත් ලැජ්ජාවක්, වරද සහගත බවක් අපිට අතීතයේදී දැනී ඇත. සැඩ පරුෂ ගුරුවරුන්ගෙන් එක වරක් පහර කෑවද ඊළඟ වතාවේ හසුනොවන ලෙස ඒ වරදම කිරීමට අපි‍ පෙළඹුනෙමු. ඔහුට අපිව විනයගත බව පෙනුනද සැබවින්ම අපි ඔහු ළඟ විනයගත වූවන් නොවුණෙමු.


හමුදා විනය තුළ වෙලාවට අවදිවීම, වෙලාවට වැඩ කිරීම, කම්මැලිකම දුරුවීම, ඈලිමෑළි ගති දුරුවීම වගේ දේවල් ඇති වන බවත් එය ජීවිතය වෙනස් කරන බවත් ඉහත සඳහන් කල තුන්වැනි කණ්ඩායම දරණ ලද අදහස විය. එය ඇත්තකි. ඒත් එය හැමෝටම පොදු වූවක් නොවී සිවිල් සමාජය ඉදිරියේ වඩාත් විනය විරෝධීන් කොටසකුත් ඔවුන් අතරින්ම බිහිවන්නේ එය හුදෙක්ම කායිකමය තත්වයේ වන නිසාය.


එම පුහුණුව නොලදත් මේ ලියුම්කරුද වෙලාවට අවදිවෙයි, වෙලාවට වැඩකරයි, කුසීත කම දුරු කර ඇත. පිළිවෙලට වැඩ කරයි. කායික වශයෙන්ද සෞඛ්‍ය සම්පන්නය. ඒ කිසිවෙකුගේ අණක් පිළිපැදීමකින්‍ නොවේ. ලැබුණු සිවිල් බලයක් නිසාත් නෙවෙයි. ඒත් විනයගත පුහුණුවක් ඔස්සේමය. ඒ පුහුණුව ලැබුවේ හමුදා කඳවුරක් තුළ නම් නෙවෙයි. නිහඞතාවය තුළයි. එය මූලික වශයෙන් මාස තුනක් අඛණ්ඩව සිදු කෙරිණ. එය සම්පූර්ණයෙන්ම අනෙකුන් ඉදිරියේ ශක්තිමත් වන්නෙකු හෝ කැපී පෙනෙන පුද්ගලයෙකු වීම පිණිස වූවක් නොවේ. ඒ පුහුණුවේදී සම්පූර්ණයෙන්ම අනෙකා අමතක කොට තමාගේම ස්වභාවය අවබෝධ කරගැන්මක් සිදුවුණි. එය සම්පූර්ණයෙන්ම අධ්‍යාත්මික වූවක් වන අතර  කායික ශක්තියද එතුළින් තිරවිය. එසේම එකිනෙකා පරයා යන උන්නතිකාමී ආශාවන්ගේ මෝඩ ස්වභාවය අවබෝධ කරගැන්මට ඒ පුහුණුව සහ ඉන් අනතුරුව නොකඩවා කරන්න ආශා හිතෙන ක්‍රියාකාරකම් පුයෝජනවත් විය. තවදුරටත් ප්‍රයෝජනවත් වේ. තමන් තුළ නිවුණු සැනසුණු පුද්ගලයෙකු බිහි වන විට බලෙන් ඇති නොකරන ලද ස්ථාවර විනයක් කොහෙන්දෝ පැමිණ ලැගුම් ගෙන තිබේ. එය සම්පූර්ණයෙන්ම තමාටම අවංක වීමකි.
මෙවැනි පුහුණු තවත් සමහර රට වල සිදුවී තිබේ. චීනය විසින් ආක්‍රමණය කිරීමට පෙර ටිබෙටය තුළ දරුවන් මේ විනයගත කිරීමට යොමු කෙරිණ. එනිසාම සියවස් ගණනක් ලෝකය ඉදිරියේ ටිබෙටය පැවතුණේ විශාල සාමයක නිසා එවැනි රටක් ගැන ලෝකයට අමතක වී තිබිණි. ඒත් හමුදාගත විනය තුළින් උන්නතිකාමී සමාජවාදී චීනය විසින් තමන්ගේ මනුෂ්‍යත්වයේ විනය කොයිතරම් පහත්ද යන්න ‍පෙන්වූයේ සාමකාමී ටිබෙටය ආක්‍රමණය කිරීමෙනි. අදටත් නියමිත පරිද විනයගත වූ ටිබෙට් නායක දලයි ලාමා තුමා සංයමයෙන් සහ වෛරයෙන් තොරව තමන්ගේ රටට නිදහස සොයමින් සිටියි.
සත්‍ය වශයෙන්ම කායික විනය පමණක් වැඩකට නැත. එය අනර්ථකාරීය. අධ්‍යාත්මික විනය ඊට ඇතුළත්වූ පසු පමණක් විනය ගත කිරීමට වෙහෙසීමක් නැතිවම විනය පුද්ගලයා තුළට පැමිණෙයි. එය බලෙන් ආරෝපණය කිරීමක් නොවන අතර ස්වභාවිකව සිදුවෙන්නකි.
ඒ විනය ජීවිතයේදීත්, මරණයේදීත් කෙනෙක්ට සුවය ගෙන එයි. ‍එසේම සමාජයක් මනුෂ්‍යත්වයෙන් පොහොසත් කිරීමට අවශ්‍ය අදේශපාලනික සංයමය, අවංක බව එතුළින් පුද්ගලයා තුළට පැමිණේ.
එහෙත් මේක දේශපාලනයේ රඟමඩලයි. මෙහි සිදුවන සියල්ල මනුෂ්‍යත්වයට එරෙහිවයි.

May 21, 2011

නායකත්ව පුහුණුව සහ නිදහස් අධ්‍යාපන බොරුව

සරසවි සිසුන්ට ලබා දෙන්න නියමිත නායකත්ව පුහුණුව නමින් වූ හමුදා පුහුණුව එපරිදිම පවත්වන බව උසස් අධ්‍යාපන ඇමැතිවරයා පවසා ඇත. එය හුදෙක්ම ඇමැතිවරයාගේ අත්තනෝමතික අවශ්‍යතාවයක් මිස අධ්‍යාපනයේ අවශ්‍යතාවයක් නොවන බව පෙනී යයි. උසස් අධ්‍යාපන ක්ෂේත්‍රය වැනි විෂයක් භාරව කටයුතු කල යුත්තේ සැබැවින්ම බුද්ධිමත්ව කටයුතු කල හැකි අමාත්‍යවරයෙක් වුවත් එය නිකම් නිකම් වැඩකට නැති ජෝකර් කෙනෙකු අතට පත් කිරීමට රජය කටයුතු කර ඇත. 
උසස් අධ්‍යාපනයේ අවශ්‍යතාවයක් නොවන මෙවන් පුහුණුවක් බලෙන් සිසුන් මත පැටවීම නිදහස් අධ්‍යාපනය කියන සංකල්පය තව දුරටත් නිදහස් නොවන බවට සාක්ෂියකි. එසේම දැනට උසස් අධ්‍යාපනය සඳහා සුදුසුකම් ලබන්නන් වසරකට ලක්ෂයකට අධික වන නමුත් එයින් හතරෙන් එකක් වන ප්‍රමාණයකටවත් තමන්ගේ අධ්‍යාපන අයිතිය සඵල කර ගැන්මට අවස්ථාව සැලසීමට මෙරට විශ්ව විද්‍යාල පද්ධතිය අපොහොසත්ව තිබේ. එබඳු තත්වයක් යටතේ මෙතෙක් පැවැති බාහිර උපාධි ලියාපදිංචියද අත්හිටුවීම මෙසේ තම අයිතිය අහිමි වූ සිසුන්ට යන්න තිබුණු අතුරු මාර්ගද වසා දැමීමකි. ඒ සම්බන්ධව අමාත්‍යාවරයා කියා තිබුණේ බාහිර උපාධිකාරයෝ කාළකණ්නි කොටසක් බවයි. ඔවුන්ගෙන් සමහරුන් සාමාන්‍ය පෙළ ගණිතය පවා අසමත් බවයි. එහෙත් බාහිර උපාධි සඳහා ලියාපදිංචි කිරීමේදී අවශ්‍ය සුදුසුකම් නිවැරැදිව තහවුරු කර ගැනීම හෝ අදාල උපාධිය සඳහා වන විෂය නිර්දේශයන්ගේ ගුණාත්මකභාවය පවත්වා ගැනීමද සිසුන් සතු කාර්යයක් නොවන අතර, එය පරිපාලනය සතු වගකීමකි. ඒ අනුව සැබෑ කාළකණ්නි බාහිර උපාධි ලබන සිසුන්ද නැත්නම් එය කළමනාකරණය කරන පරිපාලනයද යන්න තේරුම් ගැනීමටනම් මොළයක් ලෙස කිසිවක් හිස තුළ තිබිය යුතුමය. එසේම විශ්ව විද්‍යාල වලින් බිහි කරන්නේ රස්තියාදුකාරයෝ, ගංජ කාරයෝ බවද එයට විශ්ව විද්‍යාල ආචාර්යවරු වගකිව යුතු බවත් එස්බී ඇමැතිවරයා පවසා තිබුණි. එහි යම් සත්‍යයක් ඇති බවට තහවුරු කරගැන්මට සරල සාධාරණ උදාහරණයක් ලෙස මෙම ඇමැතිවරයාම ගත හැක.
උසස් අධ්‍යාපනයට හිමිකම් ලබන සිසුන්ගෙන් අඩකටවත් තමන්ගේ අධ්‍යාපන අයිතිය තහවුරු කර ගැන්මට බැරි තත්වයක් යටතේ පවතින්නේ නිදහස් අධ්‍යාපනයක්ද යන්න විමසීමට ලක්කල යුත්තකි. එසේම පාසල් අධ්‍යාපනය තුළ නොමිළේ අධ්‍යාපනය ලබා දෙන බව ඇත්තක් වුවත් නිසි අධ්‍යාපනයක් සියල්ලන්ටම එකසේ ලැබෙන්නේ නැත. නාගරික පාසල්වල  අධ්‍යාපනය පදනම් කරගෙන කොළඹ ඉන්න මහාචාර්යවරු තමන්ගේ බුද්ධි මහිමය පෙන්වීමට සකසන ප්‍රශ්ණ පත්‍රයක් තුළින් රටේ සියඵම සිසුන්ගේ අධ්‍යාපනික තත්වය අභියෝගයට ලක් කිරීම අසාධාරණ විහිඵවක් පමණි. නගර වලින් ඈතට යන විට එම ප්‍රශ්ණ පත්‍ර වලින් අභියෝගයට ලක් කරන දැනුමෙන් අඩක් වත් ලබා ගැනීමට දරු දැරියන්ට අවස්ථාවක් නැත. මේ ඉහළ අධ්‍යාපනික තරඟකාරිත්වය සහ ඉගැන්වීම නැති දුෂ්කර ඈත පාසල් තුළ සිටින දරු දැරියන්ට තවමත් මේ ප්‍රශ්ණ පත්‍ර වලින් විමසන දැනුම ලබා ගැනීම සිහිනයක් පමණි. ඊට අවශ්‍ය ගුරුවරු තම පාසල් වල නැත. ගුරුවරු සිටියත් සමහර ගුරුවරුන් අවශ්‍ය මුඵ දැනුමම ලබා දීමට අපොහොසත්ය. ඔවුන්ට නගර වල මෙන් එසේ පාසලෙන් නොලැබෙන අධ්‍යාපනය ලැබීමට ටියුෂන් කඩ නැත. දුරින් වූ නගරයේ ටියුෂන් යාමට අවශ්‍ය ආර්ථික ශක්තිය බොහෝ දරු දැරියන්ට නැත. අවම වශයෙන් විෂයන්ට අදාල පොතපතවත් සොයා ගැනීම දුෂ්කරය. අලුත් තාක්ෂණය හරහා ලබන දැනුම ඔවුන්ට අහිමිය. ඇත්තෙන්ම ඔවුන්ට ලැබෙන අධ්‍යාපනයේ සහ මේ කොළඹ ඇතුඵ ප්‍රධාන නගරවල දරු දැරියන්ට ලැබෙන අධ්‍යාපනයේ ඉතාම ඉතා ‍ලොකු වෙනසක් ඇත. ධනය හිඟ නැත්තවුන්නම් කෙසේ හෝ තම දරුවන් මේ තරඟයෙන් ගොඩ දැමීමට තමන්ගේ සල්ලි විසි කරති. ඒත් අවසානයේ ඔවුන්ගේ දැනුම සහ එයින් අඩකවත් දැනුම, අධ්‍යාපනය හරහා නොලැබුණ දරුදැරියන්ගේ දැනුම එකම විභාග අභියෝගයකින් මනිනු ලැබේ. ඇත්තෙන්ම මෙය නිදහස් අධ්‍යාපනයක් නොවේ. නොමිලේ පාසල් අධ්‍යාපනයක් ලබා දෙන බව පැවසූ පමණින් මෙය නිදහස් අධ්‍යාපනයක් විය නොහැක. පාසල් විවෘත කර තිබුණද අභියෝගයට ලක්කරන සියඵ දැනුම ඒ තුළින් නොලැබෙන්නේනම් එය නිදහස් අධ්‍යාපනයක් නොවේ. මෙය ඉතාම අසාධාරණ ක්‍රමවේදයකි. ඒ අසාධාරණ ක්‍රමය තුළින් හෝ උසස් අධ්‍යාපනය සඳහා සුදුසුකම් ලබන සියඵ සිසුන්ට තම අධ්‍යාන අවශ්‍යතාවය ඉටු කර ගැනීමට අවකාශ සැපයීමට උසස් අධ්‍යාපන බලධාරීන් වගේම විශ්ව විද්‍යාල පද්ධතිය ‍අපොහොසත්ව ඇත. මේ කරමින් සිටින්නේ කොටසක් වෙන්කර ඔවුන් සුපිරි බවට පත්කර බහුතරය පාලනය කරන්නවුන් බවට පත්කරන දේශපාලනයම මිස වෙන කුමක්ද?
අවසාන වශයෙන් ඔවුන්ට තිබුණු බාහිර උපාධි අපේක්ෂාවද කප්පාදු කර ඇත්තේ තමන්ගේම දුර්වලකම් වසා ගැනීමට නොහැකිව එය එම අධ්‍යාපනය ලබන්නවුන් මත වපුරමිනි. එහෙත් ලංකාවේ බාහිර උපාධිය ලබා නොගෙන විශ්ව විද්‍යාල වලට නොතේරුණද තමන්ගේ මුදල් බලෙන් විදේශ විශ්ව විද්‍යාල වලින් අධ්‍යාපනය ලබා උපාධි රැගෙන විත් ලංකාවේ රාජ්‍ය සේවයේම ඉහළ තනතුරු ඇතම්හූ දරති. ඔවුන්ගෙන්ද සමහරුන් සාමාන්‍ය පෙල ගණිතයවත් සමත් නැත. ඒත් එස්බීට එය නොපෙනෙන්නේ හොර පාරෙන් ගමන් කිරීම ධනවතුන්ට කැප වන අතර දුබලයන්ට අකැප ලෙසට මෙ‍රටෙහි හැම ක්ෂේත්‍රයකම පවතින ක්‍රමය ඔහුද හිස් මුදුනින් පිළිගන්නා නිසාය. ඇත්තෙන්ම නිදහස් අධ්‍යානය කියා දෙයක් ‍තව දුරටත් නැත. එය බොරුවකි. මෙතැන පවතින්නේ දේශපාලනික අභිමථාර්තයන් පමණි.

May 19, 2011

පිළිවෙතින් පෙළ ගැසීමේ දේශපාලනය



රජු සොරකම් කරන්නවුන් හිස් සිඳුවා මරවන බව ඇසූ මිනිස්සු අපි යම් කෙනෙකු ගේ ධනය පැහැර ගනිමු නම්, ඒ ධන හිමියන්ගේ හිස් සිඳිමුයි තියුණු ආයුධ සාදාගෙන ගම් නියම් ගම් කොල්ලකෑමටත් ධන හිමියන් හිස් සිඳ මරන්නටත් ගත්හ. මෙසේ දිළිඳුකම වැඩි වීමෙන් නොදුන් දේ සොරාගැනීම වැඩි වීමත්, එයින් ආයුධ දැරීම වැඩිවීමත් ඒ නිසාම ප්‍රාණඝාතය වැඩිවීමත් නිසා මිනිසුන් ගේ ආයුෂයද වර්ණයද පිරිහිණි. අසූ දහස් අවුරුදු ආයුෂ ඇති මිනිසුන් ගේ දරුවෝ අවුරුදු හතළිස් දහසක් ආයුෂ ඇත්තෝ වූහ.
අනතුරුව එක්තරා මිනිසෙක් අන්සතු දේ සොරකම් කළේය. රජු ඉදිරියට පමුණුවනු ලැබූ ඔහුගෙන් තෝ සොරකම් කළේ සැබෑ දැයි ඇසූ විට නැත දේවයන් වහන්ස යැයි බොරු කීවේය.
මහණෙනි, මෙසේ ධනය නැත්තවුනට ධනය නොදීමෙන් දිළිඳු බවද, සොරකමද, ආයුධ දැරීම ද, ප්‍රාණඝාතයද, මුසාවාදයද වැඩි වීමෙන් මිනිසුන්ගේ ආයුෂ ද වර්ණයද පිරිහිණ. හතළිස් දහසක් ආයුෂ ඇති මිනිසුන්ගේ දරුවෝ විසි දහසක් ආයුෂ ඇත්තෝ වූහ. එකල්හි එක්තරා මිනිසෙක් අන්සතු දේ සොරකම් කළේය. එය දුටු වෙනත් පුරුෂයෙක් අසවලා සොරකම් කළේ යැයි කේළාම් කීයේය. මහණෙනි, මෙසේ ධනය නැත්තවුනට ධනය නොදීමෙන් දිළිඳු කමද, සොරකමද, ආයුධ දැරීමද, ප්‍රාණඝාතයද, මුසාවාදයද, කේළාම් කීමද, වැඩි වීමෙන් මිනිසුන්ගේ ආයුෂද වර්ණයද පිරිහිණ. විසි දහසක් ආයුෂ ඇති මිනිසුන් ගේ දරුවෝ අවුරුදු දස දහසක් ආයුෂ ඇත්තෝ වූහ.

බුදු රජාණන් වහන්සේගේ දේශණාව එපරිදිය. මනුෂ්‍ය ආයුෂ මෙන්ම සියඵ පරිහාණියන්ගේ වර්ධනය සිදුවන ආකාරය උන් වහන්සේ මැනවින් දේශණා කොට ඇත.
ඕනෑම සමාජයක පරිහාණියට හේතු වන්නේ විසංතුලනයයි. එනම් පරතරයන් අධික වීමයි. එම පරතරයන් තුළිත කිරීම සඳහා මනුෂ්‍යත්වයට නොගැලපෙන ලෙස ක්‍රියාකාරී වන මිනිසා පිරිහුණු අධ්‍යාත්මයකට ඇද වැටෙයි. කෙමෙන් කෙමෙන් සමාජයද ඒ පිරිහුණුභාවයට ඇද වැටෙයි. ඉතින් බුදු වදන් අනුව හෝ බුද්ධ දර්ශණය අනුව හැඩ ගැසීම සම්පූර්ණයෙන්ම වාගේ පිළිවෙතින් සමතුළිතය වෙත ගමන් කිරීමක් විය යුතුය.

ඒ වෙනුවට පිළිවෙතින් පෙළගැසෙමු යනුවෙන් වචන දෙකක් ජනප්‍රිය කිරීම හරහා නිකම්ම දේශපාලනික ආකාරයේ ආත්ම වංචාවක් මෙන්ම සමාජ වංචාවක් තුළට බුදුන්ගේ දැක්ම ලඝු කරන්නේනම් ඔවුන් කිසිදා බුදුන්ගේ අනුගාමිකයෝ හෝ ශ්‍රාවකයෝ විය නොහැකිය.
එසේ කරනවා වෙනුවට සමාජයේ මෙන්ම පුද්ගලයාගේද පිරිහීමට හේතු සාධක වූ කාරණයන් තමන් තුළින්ම පිටු දැකීම උදෙසා අතිමහත් අවංකභාවයකින් කටයුතු කල යුතුය. එහෙත් එවැන්නක් කිසිදා මෙරටෙහි සිදු නොවිණ. බුදුන්ගේ දර්ශණය තුළින් තමන්ගේ ලෞකික මුදුන් වීමේ අභිප්‍රායයන් සඵල කර ගැන්මට අමන උත්සාහයක නිරත වීමෙන් එම දර්ශණය හෑල්ලුවට ලක් කිරීම අදත් සිදුවේ. සම්පූර්ණයෙන්ම තථාගත දර්ශණය දේශපාලනීකරණය වී ඇත. එබැවින් තථාගත දර්ශණය අනුවම සමාජය සහ පුද්ගලයා තව දුරටත් මේ ආත්ම වංචාව, බොරුව තුළින් තව තවත් පරිහාණියටම ගමන් කරනු ඇත.

2600 සම්බුද්ධ ජයන්තිය නිමිත්තෙන් පිළිවෙතින් පෙළගැසෙමු යනුවෙන් රටපුරා තොරණ ඉදිකළාට, බෝධි පූජා පැවැත්වූවාට, පිරිත් සජ්ජායනය කළාට පමණක් වැඩක් නැත. ඒ සියල්ල සැබෑ පිළිවෙත නොවේ. එසේම ඇමැති වරු මාධ්‍ය ඉදිරියේ තට්ටය ගාගෙන, ප්‍රාඩෝ එකෙන් ගිහින් සතියකට සිල් රෙද්දක් පොරව ගත්තට වැඩක් නැත. ඒ සියල්ලම මමත්වය විශාල කරවන අභිලාෂයෙන් කරනු ලබන කෛරාටිකකම් පමණි. පාලකයින් සිරි සුභ වෙසක් මංගල්‍යයක් වේවා කියල මහජනයාට එස්එම්එස් යැවීමෙන්ද ඵලක් නැත. ඒ සියල්ල මමත්වය තව තවත් මුදුනට ගෙනයාමට මහජනයා රැවටීම සඳහා කරන ක්‍රියාකාරකම් පමණි.
සැබැවින්ම පිළිවෙතින් පෙළ ගැසීම අවශ්‍ය වන්නේනම් මෙවැනි ජනප්‍රිය දේවල් වෙනුවට කෙළින්ම තමන්ගේ හදවත තුළින් බුදුන් වදාල මනුෂ්‍යයාගේ සහ මනුෂ්‍යත්වයේ පරිහාණියට තුඩු දෙන ඉහත සඳහන් විසංතුලනයන් සංතුලනය වෙනුවෙන් පෙළගැසිය යුතුය.

අද මේ සමාජය තුළ ඇත්තෙන්ම ප්‍රාණඝාතය, සොරකම, බොරුව, රැවටීම, කේළම, සුරාව, සූරාකෑම, දූෂණය මෙතරම් මුදුන් පත් වී ඇත්තේ ඇයිද යන්න සලකා බැලිය යුතුය. ඒ සියල්ල සඳහා නායකත්වය සහ ආදර්ශය සපයන්නේද ‍දේශපාලකයින්මය. ඔවුන් ඒ කාර්යයේදී නම් ඉතාම අවංක වෙති. ඒ සියල්ල තමන් තුළින්ම නොදකිමින් මේ සාරධර්ම පිරි සමාජයකැයි පවසමින් තවත් මුසාව තුළ ගිලී යෑම වෙනුවට සැබැවින්ම පිළිවෙතින් පෙළගැසීම දැන්වත් ඇරැඹිය යුතුය. ඒත් එය හෙටවත් සිදුවෙයිද? තථාගත‍ දේශණයට සැබෑ පැවත්මක් ලැබෙයිද?

එසේ නොවන්නේනම් ඒ සියල්ල දේශපාලනයම පමණි.